أولا بلاش تستخدمي مساحيق ومنظفات أو مطهرات بكميات كبيرة، مش هو دة الحل كدة بتخلصي المنظفات على الفاضي، المهم تختاري نوع كويس ومناسب للحاجة اللي هتنضفيها.
بلاش تستخدمي الإسفنجات الخشنة في تنضيف أي حاجة، بتجرح الحلل والبلاستيكات وهتبوظ شكلها، الأحسن تستخدمي الإسفنجة الناعمة، وللدهون الصعبة استخدمي مياه سخنة أو خل وليمون.
الخل والملح والليمون مش عمال على بطال، فيه حاجات مش بتستحمل نسبة الأحماض، حاولي تقللي استخدامها.
السجاد لو وقع عليه عصير بلاش تفركي البقعة كدة هتبوظي قماش السجادة، نشفي الأول البقعة كويس بقماش أبيض وبعدها استخدمي المنظف اللي يناسب البقعة، لو لبانة وقعت أول حاجة هتجيبي تلجة وتسيبيها على اللبانة لحد ما تنشف وتتجمد بعد كدة هتتشال معاكي بسهولة.
لو في إطباق أكل سمك أو دهون زيادة مثلا بلاش تحطيها في الحوض على باقي المواعين، خليها على جنب أو نزلي عليها مياه سخنة الأول هتساعدك على تنضيفها بعد كدة.
مكان البيض في التلاجة لو إتكسرت فيه بيضة لازم تنضفي مكانها الأول قبل ما تحطي مكانها واحدة، الجديدة هتلزق وتتكسر برضو.
أي حاجة تقع أو تفور على البوتجاز حاولي تنضفيها على طول بلاش تسيبيها لتاني يوم، البقع هتلزق وتبقى صعبة في تنضيفها.
عامة لو نضفتي الحاجات أول بأول حتى لو على الماشي كدة، مش هتتعبي في التنضيف أخر الأسبوع وهتلاقي الدنيا سهلة معاكي.
