اليومين دول الجو شادد حيلة علينا والشمس عاملة الواجب وزيادة، وطبعا ورانا شغل ومصالح ماينفعش نفضل في البيت، بس لازم ناخد بالنا عشان سهل أوي ناخد ضربة شمس ودي مش سهلة ليها مضاعفات كتير من أول الإغماء لحد الوفاه لا قدر الله.
* للوقاية:
هنحاول دايما نلبس بلوزات شيفون خفيفة وألوانها فاتحة بلاش الغوامق عشان بتمتص حرارة الشمس.
هنشرب مياه وسوايل على قد ما نقدر عشان نعوض اللي جسمنا بيفقده، دايما نبقى في مكان مفتوح وفيه تهوية ناخد بالنا مانسيبش الأطفال واللي سنهم كبير في العربية مثلا وقت طويل من غير تكييف.
ننسى بقى الجيم خالص الفترة دي ولو لازم يعني يبقى تمارين بسيطة الصبح بدري أو بليل قبل النوم.
* الأعراض:
أول حاجة درجة حرارة الجسم بتزيد ل 40 وأكتر.
عكس المتوقع هنلاقي مفيش عرق والجسم جاف.
غثيان وقئ وفيه حالات إغماء، هنلاقي جلد الوش أحمر وملتهب من الحرارة.
صعوبة في التنفس وسرعة في ضربات القلب، كمان فيه حالات هلوسة وكلام مش مفهوم.
* الإسعافات:
- لازم الشخص يرتاح ويمدد على ضهره في أوضة فيها تكييف وتهوية كافية.
هنخفف اللبس قد الإمكان ونسمحله يتنفس كويس.
يشرب مياه أو سوايل لو هيقدر.
لازم يغسل وشة وجسمه بمياه باردة.
المفروض في خلال 30 دقيقة يتحسن لو إستمر لازم يتنقل للمستشفى
