طريقة تدريب الطفل على الحمام والتخلص من البامبرز

متى ممكن ندرب الطفل على البوتي ... ياترى نبدا بدري عشان نعرفه ويطلع واعي وفاهم ... ولا نستنى وكل الي حواليكي يقولولك انتي غلطانه وانت السبب...؟؟؟؟

1) مراعاه لتطور الجهاز العصبي للطفل نبتدي تدريب الطفل من عمر 2-2,5 وهتعرفي مدى استجابته للتدريب عن طريق كلمات تدل على ذلك او اشارات 

2) لازم الطفل يكون مستعد للتعاون معاكي في عمليه التدريب يعني يفهم كلامك , يعبر عن حاجته للحمام عن طريق كلام مفهوم او تعبيرات وشه او وضع يبين انه محتاج الحمام , يكون طفلك قادر انه يقعد مايقارب ساعتين جاف , تلاحظي ان طفلك بيتضايق لما يبقى مبلول او البامبرز مش نظيف , هتلاقيه بينزل هدومه لوحده عشان يعمل حمام ,واخيرا يكون بيعرف يقعد على البوتي او كرسي الحمام ولو هيستخدم كرسي الحمام يبقى حاولي توفيرله قعده على مقاسه وياريت لو كرسي صغير يعرف يطلع عليه عشان وهو قاعد يبقى حاسس بالامان .

3) خلاص ابنك بقى عارف يعمل كل الي فات ... وحضرتك رتبتيله الكرسي المناسب فالحمام ... حاولي يبقى في بوتي فالمحيط الي هو بيلعب فيه عشان يبقى على طول فاكرها 

4) ابقي خلي معاه لعبه وهو داخل الحمام يلعب بيها وانتي تبقي قاعده معاه تونسيه ‏‎.

5) لما تلاحظي اي علامات وهو بيلعب بتدل ع انه عايز يعمل حمام زي انه يقعد ويقرفص او غيره وقفي الي بيلعب بيه وخديه فورا على الحمام

6) في بعض الاطفال بيستجيبوا للستيكرات والجداول التشجيعيه والي ممكن تديهم عليها جوايز ... وانا جايبالكو عليهم امثله

7)التدريب على البوتي بالنهار مش هيحتاج وقت ممكن كبير يعني من شهر او اتنين او تلاته لكن التدريب على ان طفلك يفضل جاف طول الليل ممكن ياخد وقت كبير قد يوصل لسنه او اكتر .

8) لو حصل وطفلك غلط اثناء النهار تعاملي مع الموضوع بهدوء ونبهيه بلطف ولازم تراعي احتمال حدوث انتكاسه فعمليه التدريب خصوصا لو ربنا رزقك بمولود جديد